Us Roz

Us Roz 
Kahani aur kahanikaar mile

Hasi thahaake
Fizul ki baatein
Beparvaah yuhin karte rahe

Kahani ko badi jaldi thi

Kyuki kahani kahaan rukti hai?

Yuhin firti rehti hai
Dil yahaan lagaati hai 

Sej wahaan sajaati hai

Khayaal mein aaye toh zaroori nahi

Kaagaz par utar hi aati hai

Kahanikaar kisko arzi de?

Waqt bada kambakht tha

Aur khuda... khud pop corn lekar baitha tha

Ki kya khoob nazara hai teri zindagi!
Ye manzar roz kahan milte hain?
Behaal yun malaal na kar

Har til ka taad na kar
Ya taraane hi bana kuch 

Par intezaar na kar

Toh kabhi machalta kabhi alsaata
Kahaanikaar aage badh jaata hai

Kahaani yuhin... fir kahin 

Purzor bulaati rehti hai
Kai dafa...

Kisi bhi jagah...

Hasti, usko 'hello' kehti hai

Jab woh 'haaye' karta toh koi na hota

Fir afsos jatata

Uff fir chali aai tum 

Chaahti kya ho tum?

Dikhti nahi ki zaalim
Dukhti rag ban jaati ho tum

Toh ab waapas na ana 

Aur fir ghabrana

Ki is baar rok loonga!

Kasam se jaane na doonga

Kahaani sharmai,
Aankhein michi,
Paas pohchi

Haule se poochi

"Toh kyu nahi rokte kabhi?

Meri kyu nahi sunte kabhi?

Ki main kahan jana chahti hun 

Aur tum ho ki yahan 'yatharth' mein doobe baithe ho

Dhatt!... ki ab,
Jab samjho tab
Khud bulana
Tab tak khairiyat rakhna!"

Toh kisi roz fir milenge

Zameen pe nahi
Toh rupahle parde pe sahi

Farzi ki  
Magar marzi ki 

Duniya zoroor banaenge!

Tum dekhna meri kahani...
Jis duniya ne tumko roka tha

Wahi duniya tumko dekhegi

Hasegi shayad roegi...
Naraaz hogi shayad
Najane kya sochegi
Shayad kahegi
Ye kya bana diya yaar??

Par dekhegi zaroor

Jaise khuda baitha tha 

Bilkul waise hi...
Pop corn lekar

Toh fir milenge kyuki

Us roz jab mile the...
Kuch reh gaya tha baaki.